இன்றையத் தேநீர்

தேநீரில் என்ன இருக்கிறது

டீகாசன் கூடுதலாய் இருக்கிறது

டீகாசன் குறைவாய் இருக்கிறது

இனிப்பாய் இருக்கிறது

இனிப்பில்லாமல் இருக்கிறது

சூடாக இருக்கிறது

சூடின்றி இருக்கிறது

கருஞ்சிவப்பாய் இருக்கிறது

இளஞ்சிவப்பாய் இருக்கிறது

குடிக்கிற மாதிரி இருக்கிறது

கொட்டுகிற மாதிரியும் இருக்கிறது

இருக்கிறது இன்னும்

அதில்

வனம் மனிதனைக் கொன்ற வரலாறு இருக்கிறது

பாரம்பரிய பயிர்விப்பிற்கு வந்த நோய் இருக்கிறது

வேளாண் பொய்த்த இனக்குழுவின் மூடத்தனம் இருக்கிறது

வறுமையின் இருண்ட பக்கம் இருக்கிறது

தலைமுறைகளின் அடிமை வாழ்வு இருக்கிறது

முதலாளித்துவத்தின் சுரண்டல் இருக்கிறது

துரைமாரின் ஏளனச் சிரிப்பு இருக்கிறது

அதிகாரத்தின் சவுக்கடி இருக்கிறது

தொடர் மழையின் நசநசப்பு இருக்கிறது

குளிரில் உறையும் கொடும் இரவுகள் இருக்கிறது

அட்டைகள் உறிஞ்சிய இரத்தம் இருக்கிறது

தொழிற்சாலையின் காது கிழிக்கும் இரைச்சல் இருக்கிறது

கொதிகலனின் சதை வேகும் வெக்கை இருக்கிறது

யானை கூட்டங்கள் செய்த துவம்சம் இருக்கிறது

கரடி சிறுத்தை புலியின் பிராண்டல் இருக்கிறது

தேனீ கடந்தை தேள் கொட்டிய வீக்கம் இருக்கிறது

அரணைக்கும் பாம்புக்கும் பலியான உயிர் இருக்கிறது

ஒரு வர்க்கத்தின் முடக்கப்பட்ட போர் குணம் இருக்கிறது

சீண்டப்பட்ட சிறுமிகளின் ஓலம் இருக்கிறது

பெண்ணியம் இழந்த கற்பு இருக்கிறது

அடிப்படை உரிமைகளின் புறக்கணிப்பு இருக்கிறது

ஒடுக்கப்பட்ட போராட்டத்தின் மரணம் இருக்கிறது

இயலாமையின் செருப்படி இருக்கிறது

கவாத்து வெட்டப்படும் இளையோரின் வளர்ச்சி இருக்கிறது

ஒரு கோப்பைத் தேநீர்

எப்போதும் போல் குடித்து

எப்போதும் போல் மூத்திரம் பெய்வதல்ல

அது

காலை குளிரின் தீக்கனப்பு

அலுவல் அழுத்தத்தின் புத்துணர்ச்சி

பேசாத மெளனத்தின் வார்த்தைகள்

வந்தாரின் உபசரிப்பு

நட்பின் அளாவுதல்

காதலரின் சந்திப்பு

புது வாழ்க்கையின் சம்மந்தம்

ஏழையின் பசிக் கொல்லி

வயோதிகத்தின் உணவு

சிலருக்கு விடமுடியாப் போதை

அது மானுடத்தில் கலந்த கலாச்சாரம்

அது அகிடைமட்ட பொருளாதாரம்

பரிதவிப்பின் நுரை பொங்கும்

எனது இன்றையத் தேநீர்

குடிக்கும் நிலையில் இல்லை

எல்லா மழைக்காலமும்

தேநீரில்

கொஞ்சம் மிளகை அள்ளி போட்டிருக்கிறது

இந்த மழைக்காலம்

தேநீரில்

கொஞ்சம் மண்ணை அள்ளி கொட்டிவிட்டது

- மகேஷ் பொன்