நிலவின் பாலினம் குறித்து

பாட்டி சுட்ட தோசை!
பாதி பிய்த்த அப்பம்!
மேகம் புகுந்து செல்லும் வாகனம்!
என்று நகையாடுங்கள்..
பதினைந்து நாள் சம்பாதித்ததை
பதினைந்து நாளில் செலவிடும் வீணன்!
இரவுச் சூரியன்!
என்று தத்துவம் பேசுங்கள்...
நீல ஆடைக்குள் உடல் மறைக்கும் பெண்!
ஒளிரும் பொன் கிண்ணம்!
காதலியின் வட்ட முகம்!
என்று கவிதை எழுதுங்கள்..
தேய்கிறது!
வளர்கிறது!
அம்மாவாசையன்று தொலைந்துபோகிறது!
என்று கதைக்கட்டுங்கள்..
இன்னும்-
வானில் இடம் சுட்டி
குழந்தைக்கு சோறூட்டுங்கள்..
பால் குழப்பம் மட்டும் செய்யாதீர்.-
நிலா எனப்படுவது போதாதெனில்
மதி என்றோ
காந்திமதி என்றோ
சந்திரா என்றோ
சந்திரலேகா என்றோ
பெயர் மாற்றுங்கள்...
சந்திரன் என வேண்டாம்.