என் ஆசிரியரின் பாராட்டைப் பெற்றதொன்று
பரிசில் பெற்றதொன்று
நண்பனின் காதலுக்கு தூதானதொன்று
விழா மேடையை தன்வயபடுத்தியதொன்று
திருமண பிளக்ஸ் ஏறியதொன்று
வாழ்த்து மடலானதொன்று
இரங்கற் பாவானதொன்று
புரட்சி பேசியதொன்று
கம்யூனிச சுவரொட்டியானதொன்று
மெட்டுகட்டி பாடல் பெற்றதொன்று
தங்கையின் வாரஇதழில் பிரசுராமானதொன்று
ஊடல் தனித்ததொன்று
பொரிகடலை அச்சுவெல்லத்திற்கு மாற்றானதொன்று
பொன்மொழியாய் நிலைப்பெற்றதொன்று
காதலியை பெற்றுத்தந்ததொன்று
பின் அவள் தோழியையும் வசப்படுத்தியதொன்று
பெண்ணுடலைப் பெற்றுத்தந்ததொன்று
இரவுகளைத் தின்றதொன்று
4151 லைக்குகளைப் பெற்றதொன்று
ஒன்று தற்குறிப்பேற்ற அணிக்கு உவமையாயிற்று
மற்றொன்று பெருங்கவியின் கவிதையில் இரு வரிகளாயிற்று
இருந்தும் என் ஏக பத்தினியிடம்
ஒவ்வொரு அடிக்கும் அடிவாங்கித் தந்த கவிதைகளை
முன்னால் காதலிகளுக்கு சமர்ப்பிக்க இயலாமல் போயிற்று
