இது ஒரு மலை வீடு
இங்குதான்
அவர்கள் காதலியரும்
காடோடியாய் வாழ்ந்துள்ளார்கள்
அப்பாவும் அம்மாவும்
அநர்த்தம் இன்றி வாழ்கிறார்கள்
இந்த ஆவக்கீற்று கூரையின் கிழ்
நானும்தான் வாழ்கிறேன்
இது இயற்கையின் மடியில்
நவினமும் நாகரிகமும் புசிக்காத ஊர்
கொன்றை பூச்சொரியும் வழிகளையுடையது
சாரல் தூரும் மேகங்களையுடையது
மரங்கள் போர்த்திய பசுமையையுடையது
நாற்புறமும் அருவிப் புறங்களையுடையது
கொல்லையில் மரச்சீனி விளைகிறது
வீடண்டி முக்கனியும் கனியும்
மிளகுக் கொடி மயிலையில் ஏறும்
கிடா நார்த்தை ஓடைக்குள் உருளும்
கமுகு எப்பொதும் பேயாட்டம் கொள்ளும்
கொணர்ந்த தேன் திணைப்புன பரண் புகும்
புன்னையின் நிழலில் அரவம் கூடும்
கடப்பு அணையா தேதண்ணீர் உகும்
இவ்வீட்டிற்கு
காட்டுயிரிகள் வந்து போகும்
கரடி வருக்கை மணந்தால் வரும்
நெடுவாலி வளர்ந்து இன்றுதான் வெளியேறியது
கடுவன் மந்தியைத் தேடி இவ்வழி மருகும்
காட்டெருமையும் மிளாவும் எதிர்முகட்டில் மேயும்
மயிலின் அகவலுக்கு இருவாட்சி குரல் கொடுக்கும்
களிறு பிளிற அதிரும் இவ்வீடு
அனிலாடும் முன்றில் கொண்டது
மானுலவும் முன்றிலும் கூட
இவ்வீட்டில்
சண்டமாருதம் தவழும் சாளரம் இல்லை
ஆளுயர நிலைக்கண்ணாடி இல்லை
புத்தகம் அடுக்க அலமாரி இல்லை
இரவு கவிபயில மின்சாரம் இல்லை
ஆடம்பரத்தை அடுக்க பிரோ இல்லை
எல்லாநாளும் அரிசி சோறும் இல்லை
ஆனாலும் இவ்வீடு
செல்வ செழிப்போடு இருக்கிறது
அண்ணனுக்கு பட்டப் பெயர் சிங்கம்
எனக்குச் செல்லப் பெயர் தங்கம்
மாமன் என்னை ”தங்கம்” என விளித்த ஒருநாள்
நான் புடம் போட்ட தங்கமாகவே மாறிவிட்டேன்
அன்றிலிருந்து இவ்வீட்டில்
42 கிலோ தங்கம் இருக்கிறது
- திவ்யா ஈசன்
கருத்துகள் இல்லை:
கருத்துரையிடுக