என் காதல் என் உரிமை

காதல் என்றவுடன்
நீதான் பூமரமாகி
என் மீது பொழிகிறாய்
நீதான் நறுமணமாகி
என் சுவாசம் நிறைக்கிறாய்
நீதான் வண்டாகி
என் கனிமனம் குடைகிறாய்
நீதான் பட்டாம்பூச்சிகளாகி
என்னை சுற்றிப் பறக்கிறாய்
நீதான் பூங்காவாகி
என்னில் அழகுற விரிகிறாய்
வான் என்றவுடன் முகிலும்
இரவு என்றவுடன் நிலவும்
பொங்கல் என்றவுடன் வடையும் கூட
ஞாபகத்தில் வரும்போது
உன்னை மட்டும் மறக்கச் சொல்கிறாயே
ஒன்று செய்
காதல் என்ற வார்த்தையை
உலக வழக்கிலிருந்து அழித்துவிட்டு வா
மறக்க மட்டுமல்ல
வெறுக்கவும் செய்கிறேன்
எண்ணெய் தீர்ந்தால் அணைந்துபோக
என் காதல் ஏற்றிவைத்த தீபம் அல்ல
உன்னை சுற்றியே பற்றி எரியும்
ஓர் அணையா சூரியன் அது
போடா டேய் உன் ஆற்றுதல் எல்லாம்
அதன் மீது ஊற்றும்
ஒரு வாளி தண்ணீர்தான்

 

- மகேஷ் பொன்