இந்த வழித்தடத்தில் ஓடும்
அத்தனை இரயில்களுக்கும் தெரியும்
எங்கள் காதல் கதை
இரயில் பயணத்தில்தான்
ஒருவருக்கு ஒருவர்
காதலைப் பரிமாறிக்கொண்டோம்
இரயில் தண்டவாளத்தில்தான்
கைகள் கோர்த்தப்படி
காதலை நடைப்பழக்கிக்கொண்டோம்
இரயில் நிலையத்திற்கும்
எங்கள் இருப்பிடத்திற்கும்
ஒரே மூச்சில் ஓடிவரும் தூரம்தான்
இரயிலில்தான்
கல்லூரிக்குப் போனோம்
இரயிலில்தான்
வேலைக்குப் போனோம்
இரயிலடி இருக்கையில் அமர்ந்துதான்
இளையராஜா பாடல் கேட்போம்
இரயிலின் வாசல் கம்பிகளில்தான்
முதல் பரிசத்தைத் தொடங்கினோம்
எங்கள் நட்பை
ஓவியமாக வரைய நேரிட்டால்
பின்புலத்தில்
நிச்சயமாக ஓர் இரயில் இருக்கும்
இருவரும்
தற்கொலை முடிவுக்கு வருகையில்
இரயில் முன் பாய்வதாகதான் இருந்தது
நீளும் இரயில் பயணத்தில்
அவள் முன்பதிவு வகையறா
நான் இல்லைமுன்பதிவு வகையறா
எனக்கு முன்பே தெரியும்
ஒருநாள் இல்லாவிட்டால் ஒருநாள்
இந்த இரயிலைத்
தலைகீழாய் கட்டித் தொங்கவிடுவார்களென
பிறகு
அவள் அப்பனின் கெளரவம்
இரயில் முன் பாய்ந்துவிடக் கூடாதென
ஓர் இராணுவ வீரனுக்கு வாக்கப்பட்டு
அவனுடன் பெருஞ்சுமையுடன்
இரயில் ஏறிப் போனதை
தூரமாய் நின்றுப் பார்த்தேன்
அன்றைய இரயில் எல்லாமே
என் நெஞ்சில் ஏறி
தடதடத்துப் போனது
கடந்த ஆறுமாதமாக
விதவிதமான இரயில்கள்
என் மூளைக்குள் ஓடிக்கொண்டிருந்தன
ஒரு இரயில் இன்ஜின்
12000 குதிரைத்திறன் கொண்டது
காலம்
அதனினும் அதித திறன் கொண்டது
அதனால்தான்
இன்றைய இரயில் எல்லாமே
வழக்கம் போல்
இருப்புபாதையில் ஓடிக்கொண்டிருக்கின்றன.
- மகேஷ் பொன்
