காதல் மறுமொழிகள்

 

திட்டமிட்ட ஏற்பாடு அல்ல

காதல்

ஆதலால் திருமணத்திற்கு பின்

உங்கள் துணையைக்

காதலிக்க முடியாமல் போனால்

என்ன செய்வீர்கள்

 

காதல் என்பது கற்பனை

திருமணம் என்பது நிஜம்

கற்பனைக்கும் நிஜத்திற்குமான

முரண்பாடுகள்

தப்பமுடியாத தண்டனைதான்

 

இனப்பெருக்கத்திற்கு ஒத்துழைப்பவர்கள்

எல்லோரும் காதலர்களாக இருப்பார்களென

நம்புவது நல்லதொரு பொய்

 

செவ்விதழ்களையும்

முலைக்காம்புகளையும்

மட்டுமே ஆய்ந்துக்கொண்டிருப்பவனின்

காதல்

தொடை இடுக்கில் முடிந்துவிடுகிறது

 

கட்டுப்படுத்த முடியாத ஆசை

கிடைமட்டம் ஆனால்

உன் காதல்

கோபுரத்தில் இல்லை

 

காதல்

எதிர்பார்க்கப்படும் போது

சுகானுபவத்தையும்

நிராகரிக்கப்படும் போது

கூடுதலாய் வலிகளையும்

தரவல்லது

 

காதல் ஒரு நெருப்பு

உன்னையும் அது பற்றிக்கொண்டது

உன் இதயம் அதில்

குளிர்காயப் போகிறதா

உன் வாழ்வு அதில்

தீக்கறையாகப் போகிறதா

இப்போது அதை

உன்னால் தீர்மானிக்க முடியாது

 

காதல் ஒரு மாயவித்தை

நாம் வேண்டாமென்றாலும்

அது மீள மீள வந்து

நம்மை ஏமாற்றவே செய்யும்

 

காதல் வந்துவிட்டால்

எல்லாமே

உள்ளங்கையில் வந்துவிட்டதாக

எண்ணுகிறோம்

உண்மையில்

எல்லாமே

விரைவில் கைவிட்டு போய்விடும்

 

காதல் மிகவும் சுவாராஸ்யமானது

சேர்ந்து வாழாத வரை

 

காதலில் தோற்பது

பெரிய வலியில்லை

ஒருமுறை ஜெயித்து பார்

தோல்வியின் வலியே

பராவாயில்லை எனத் தோன்றும்

 

- மகேஷ் பொன்

 

நீலம் பூத்தக் கைகள்

நமக்கு வாய்த்த

1008 துன்பங்களில் ஒன்று

அடர்நீல நிறச் சேலையில்

கண்ணத்தில் கை வைத்தப்படி

முதல் படியிலேயே

அமர்ந்துவிடுகிறது…

இரண்டுபடி ஏற்றிவிட்டால்

நான்குபடி சறுக்கும் அதற்கு

வெள்ளணியும் இல்லை

செவ்வணியும் இல்லை

இப்போது நாம் அதனுடன்

கைக் குலுக்கிக்கொள்ளலாம்

 

- மகேஷ் பொன்

வானவில்ரோஸ் பூக்கும் காலம்

நட்பு காதலாக உருமாறுவது குறித்து பேசினோம்;

காதல் எல்லோருக்குமானது

அதனால்தான் ராக்கி என்ற நாய்

அக்காமகள் மடியில் தூங்குகிறது என்றேன்…

காதல் பால் பார்ப்பதில்லை

அதனால்தான் ஐசும் சோபியும்

உதட்டோடு உதடு முத்தமிடுகிறார்கள் என்றேன்…

காதல் வயதுடன் தொடர்புடையதல்ல

அதனால்தான் அதனால்தான்

பதினெட்டு ஆண்டுகளை அழித்துவிட்டேன் என்றாள்…

இப்போது எனக்கு நினைவுத் தப்புகிறது

மங்கலாக நெருங்கி வருகிறாள்…

பசலையில்லா முத்தம் இனிக்கும் என்பது

சுவை நாளங்களுக்கு உரைத்ததும்

மொத்த காதலும் வந்து

என் சுவரில் வண்ணம் பூசி

ஒரு வண்ணத்துப்பூச்சியை வரைகிறது

இந்த நெடுங்கால நட்பில்

ஒரு வானவில்ரோஸ் பூக்கும் காலம் இது…

செடியில் பூவொன்று அரும்பியதும்

ஓவியத்திலிருந்து வண்ணத்துப்பூச்சி வெளியேறிற்று…

காதல் ஒரு தற்செயல் நிகழ்வு

அது திடீரென நிலைகொள்ளுமென

நாங்கள் வெள்ளையடிக்கிறோம்

அது வண்ணங்களில் இலைகள் கொண்ட

மரத்தின் பூச்சொரிவைப் போல்

எங்களை வண்ணமயம் கொள்கிறது….

எனக்கு ஞாபகம் திரும்புகையில்;

ஊர் இன்னும் அழகாக இருந்தது

ஒரு மனைவியும்

இரு குழந்தைகளும்

ஒரு நண்பனும் இருந்தார்கள்

எனது அலுவலக இருக்கை

அப்படியேதான் இருந்தது

எல்லாம் இருந்துவிட்டு போகட்டும்

இனி நான் சுயநினைவுடன் காதலிக்கிறேன்…

 

- மகேஷ் பொன்