நட்புக்கு கொஞ்சம் மேல்
காதலுக்கு கொஞ்சம் கீழ்
நட்பும் காதலும் அனாதையானால்
நல்லாண்மை இரண்டுமாக ஆகிவிடுகிறது
நான் அவளின் வளர்ப்பு நாய்
யாரை குரைக்க வேண்டும்
யாரை கடிக்க வேண்டும்
யாரிடம் வாலாட்ட வேண்டும்
என பழக்கப்படுத்தி வைத்திருக்கிறாள்
நான் அவளின் உப்பிய மணிபர்ஸ்
கடைசி ஒரு ரூபாயயையும் கரியாக்கி
கடைக் கண்ணில் மைப் பூசிக்கொள்கிறாள்
நான் அவளின் பூப்போட்ட கைக்குட்டை
எப்போதும் கையில் இருக்கும் அதை
அவளது கண்ணீர் துடைக்கவும்
எனது கண்கட்டி விளையாடவும்
ஸ்கூட்டியில் விழுந்த எச்சம் நீக்கவும்
சமயத்தில் ருதுகால திடீர் விஸ்பராகவும்
குட்டிக்குரா டால்கம் தூவி பயன்படுத்துகிறாள்
நான் அவளின் ஹைஹீல்ஸ் செருப்பு
அவளை ஒய்யாரமாய் காட்டினாலும்
தனது வீட்டிற்குள் நுழைகையில்
என்னை ஓரமாய் கழட்டிவிட்டுதான் போகிறாள்
நான் அவளின் அலாவுதீன் அற்புதவிளக்கு
ஒற்றை உரசலுக்கு கிளம்பிய அடிமைப்பூதம்
மலையைப் பெயர்க்கிறது
அலையை நிறுத்துகிறது
மின்கம்பத்தில் ஏறுகிறது
சாக்கடையில் குதிக்கிறது
புலியென மாறி உருமுகிறது
பூனையென மாறி மியாவுகிறது
படுக்கையறையில் உலவுகிறது
பாட்டிலுக்குள் அடைபடுகிறது
நீங்கள் கூறுவது போல்
அவள் என்னை எல்லாவற்றிற்கும்
பயன்படுத்ததான் செய்கிறாள்
இருப்பினும்
நானும் அவளை ஒன்றிற்கு மட்டுமாவது
பயன்படுத்ததான் ஏங்குகிறேன்
மற்றபடி நம்பலாம்
நாங்கள் நல்ல நண்பர்கள்தான்
இன்பத்திலும் துன்பத்திலும் உடனிருகிறோம்
கைக்கோர்த்து தூரம் நடந்திருக்கிறோம்
மெசஞ்சரில் இரவுகளைத் தொலைத்திருக்கிறோம்
தோள் சாய்ந்தபடி நீள பயனித்திருக்கிறோம்
கவிதையை ரசிக்கிறோம்
சினிமா பார்க்கிறோம்
அரசியல் பேசுகிறோம்
அரட்டை அடிக்கிறோம்
நான் டாய்லெட் வாயிலில் நின்றிருந்திருக்கிறேன்
அவள் ஒயின்ஷாப் எதிரில் காத்திருந்திருக்கிறாள்
டால்ஸ்டாய், சேக்ஸ்பியர், பாரதி, சுஜாதா,
இன்னும் பெண்ணியக் கவிஞர்களை எல்லாம்
என் வீட்டிற்குள் அழைத்து வந்தவள் அவள்
ழாக்டெரிடா, மார்க்ஸ், அம்பேத்கர், பாரதிநிவேதன்
இன்னும் சமூகப் புரட்சியாளர்களை எல்லாம்
அவளுக்கு அறிமுகம் செய்தவன் நான்
கோனவாய் சுயமிக்கும்
ஃப்ரி ஃபையர் விளையாட்டுக்கும்
இளையராஜா பாடலுக்கும்
எங்களுக்குள் ஒத்த ரசனை இருக்கிறது
அவள் எனது ஒரே நல்லாள்
இது வல்லான்களின் காலம்
எவனையும் நெருங்கவிடக்கூடாது
அவள் காதல் செய்யலாம் ஆனால்
காதலன் பெரும் துரோகமிளைக்க வேண்டும்
அவள் கல்யாணம் முடிக்கலாம் ஆனால்
கணவன் சந்தேகித்து சண்டையிட வேண்டும்
பெஸ்ட்டிகளின் முத்தம்
காமத்தில் சேராது என்பாள்
அவளுடன் தனியறையில் தங்கநேர்ந்த போது
பிடிப்பான மூன்று ஜட்டிகளைப் போட்டிருந்தேன்
ஓருயிர் ஈருடலாய் திரியுமிது
எதிர்பார்ப்புகளின்றி இயங்குமென்பது
நம்பிக்கொல்லும் பொய்தான்
மற்றப்படி நல்லாண்மை காத்திருப்பது
காய் கனிவதற்காகவே
இலவு காத்த கிளியென ஆவதும்
பழந்தின்னி வவ்வாலென ஆவதும்
பொறுமையின் உச்சத்தில் இருக்கிறது
பெஸ்ட்டியாக ஆசிர்வதிக்கப்பட்டவன்
இன்னும் சிலகாலம் காத்திருக்கலாம்
- மகேஷ் பொன்
கருத்துகள் இல்லை:
கருத்துரையிடுக